Bħal meta f’ħolma tinsa l-mument li tkun irqadt
u tibqa’ għaddej għal Alla tiegħek
mingħalik dak li qed tagħmel hu kollu tabilħaqq
u li xejn ma jista’ jmissek,
jew jaħkmek jew iwaqqfek;
jibqa’ għaddej minn ġo fik donnu sħab
u int, hemm, mingħalik sultan,
re ta’ ġisem mimli ċellel
lest għall-għadu, lest, arah ġej:
dak il-ħaġu kważi ħaj, daqstant mejjet,
li ma jista’ qatt iċaħħdek minn dak li huwa tiegħek.
Mingħalik.
Mingħalik, sakemm tintebaħ
kemm għebt ‘il bogħod mir-realta’
fejn dak kollu li għandek ingħatalek
u dak li ngħatalek jista’ xi darba jittieħidlek;
fejn dik il-kuruna ta’ fuq rasek issa tqalet,
u ħadet sura oħra,
ta’ kundanna,
li f’daqqa waħda kulħadd qed jinteressah minna;
fejn in-nies, jekk jorqdu, jqumu b’tisbita
bl-għaraq ma’ ġbinhom, jitriegħdu,
mhux għax kellhom xi ħolma kerha
imma għax l-għadu, issa mimli ħajja,
ħarab miċ-ċella tiegħu.
U l-ħolma x’sar minnha?
Saret traba tad-deheb, hux,
bħall-ħin, li jitfarfar bħan-ngħas
biex forsi anke jien nqum,
imqar ftit ftit,
b’moħħi imfarrak biex niftakar
kif darba, anzi l-jum ta’ qabel,
kont kapaċi nħares lejn is-sema
lejn il-baħar, lejn is-siġar u l-fjuri,
lejn in-nies ta’ madwari,
lejn familti u sħabi
mingħajr ma ngħatti wiċċi
wara l-kanċell ta’ idi.
